కేవలం 15 నిమిషాల్లోనే ఇల్లు.. హైదరాబాద్ రియల్ ఎస్టేట్‌లో నయా ట్రెండ్..

హైదరాబాద్ రియల్ ఎస్టేట్ రంగంలో ఇప్పుడు '15 నిమిషాల నగరం' (15-Minute City) కాన్సెప్ట్ విపరీతమైన ఆదరణ పొందుతోంది. ఆఫీసు, పిల్లల బడి, ఆసుపత్రి, మార్కెట్ వంటి అన్ని వసతులు ఇంటి నుండి కేవలం 15 నిమిషాల నడక లేదా సైక్లింగ్ దూరంలో ఉండటమే దీని ప్రత్యేకత. గంటల కొద్దీ ట్రాఫిక్‌లో చిక్కుకోకుండా.. కాలుష్యాన్ని తగ్గించి ప్రశాంతమైన జీవనం గడపాలని కోరుకునే వారు ఈ తరహా ప్రాజెక్టుల వైపు మొగ్గు చూపుతున్నారు. ముఖ్యంగా కోకాపేట, తెల్లాపూర్, నియోపొలిస్ వంటి పశ్చిమ హైదరాబాద్ ప్రాంతాలు స్వయం సమృద్ధి గల మినీ నగరాలుగా అభివృద్ధి చెందుతున్నాయి. కేవలం నివాసాలే కాకుండా వర్క్‌ప్లేస్, షాపింగ్ మాల్స్ ఒకే చోట ఉండటం వల్ల సమయం ఆదా అవుతోంది.