చంద్రబాబుకు మొదటి ఉద్యోగ ఆఫర్ వచ్చింది ఇక్కడే.. కానీ ఎందుకు వద్దన్నారు..?

ఏపీ మున్సిపల్ శాఖా మంత్రి నారాయణ కుమార్తె శరణి రచించిన మైడ్‌సెట్ షిఫ్ట్ పుస్తకావిష్కరణకు సీఎం ముఖ్య అతిథిగా హాజరయ్యారు. అనంతరం శరణి అడిగిన పలు ప్రశ్నలకు చంద్రబాబు సమాధానం ఇచ్చారు. అయితే ఏపీ సీఎం తనకు వచ్చిన ఫస్ట్ జాబ్ ఆఫర్ గురించి ఓ ఆసక్తికర విషయాన్ని చెప్పారు. 'నేను చదువుకునే సమయంలో నువ్వు బాగా చదివితే ఐఏఎస్ అవుతావని కొందరు చెప్పేవారు. ఐఎఎస్ అయితే పదిమందిలో ఒకడిని అవుతానని అనుకున్నాను. యూనివర్సిటీలో మా వీసీ పిలిచి లెక్టరర్ పోస్ట్ ఇస్తాను చేరతారా అంటే వద్దని చెప్పాను. ఎందుకని ప్రశ్నిస్తే ఎమ్మెల్యేగా పోటీ చేస్తానని ఆయనతో అన్నాను.. అనుకున్నట్లుగానే ఎమ్మెల్యేగా పోటీ చేసి గెలిచాక మంత్రి అవ్వాలని అనుకున్నాను. అప్పటి సీఎం చెన్నారెడ్డి దగ్గరకు వెళ్లి మంత్రిపదవి కావాలని అడిగాను.. నిన్నటి వరకు యూనివర్సిటీలో విద్యార్థిగా ఉన్న నువ్వు... ఇప్పుడు ఎమ్మెల్యేగా గెలిచి.. అప్పుడే మంత్రి పదవి అడుగుతున్నావని అన్నారు. నాకు అర్హత ఉంటే ఇవ్వండని చెప్పి ఛాలెంజ్ చేసి వచ్చాను. ఆ తర్వాత రెండేళ్లకే సినిమాటోగ్రఫీ మంత్రి అయ్యాను. తర్వాత నందమూరి జయకృష్ణ సూచనతో ఎన్టీఆర్‌ని కలిసిన తర్వాత భువనేశ్వరితో పెళ్లికి ప్రతిపాదన పంపారు' అని వివరించారు.