ప్రేమ కోసం టవరెక్కాడు.. పెళ్లి చేస్తామని కిందకు దింపి.. పెండ్లిచేశారు!

గుంటూరు జిల్లా తెనాలి సమీపంలోని పాండురంగపేటలో అశోక్‌ అనే యువకుడు సెల్ టవర్ ఎక్కి హల్‌చల్‌ చేశాడు. సోమవారం మద్యం మత్తులో సెల్‌టవర్‌ ఎక్కి అశోక్ హడావిడి చేయడంతో స్థానికులు తీవ్ర ఆందోళన చెందారు. విజయనగరం జిల్లా బొబ్బిలి సమీపంలోని నగుళ్ల గ్రామానికి చెందిన అశోక్‌.. కొన్నేళ్ల క్రితం ఓ మహిళతో వివాహేతర సంబంధం పెట్టుకొని తెనాలి వచ్చి.. తాపీ పనులు చేసుకుంటూ ఇక్కడే స్థిరపడ్డాడు. ఇదే ప్రాంతానికి చెందిన 14 ఏళ్ల మైనర్‌ బాలికను ప్రేమిస్తున్నానంటూ సోమవారం సెల్‌టవర్‌ ఎక్కాడు. తాను ప్రేమించిన అమ్మాయిని తీసుకొస్తేనే.. కిందికి దిగుతానంటూ బెదిరింపులకు పాల్పడ్డాడు. స్థానికులు అతడికి నచ్చజెప్పే ప్రయత్నం చేసినా వినలేదు. తాను ప్రేమించిన బాలికతో కనీసం ఫోన్లో అయినా మాట్లాడించాలని డిమాండ్ చేశాడు. ఈ లోపల స్థానికులు త్రీటౌన్‌ పోలీసులకు సమాచారం ఇచ్చారు. పోలీసులు వచ్చి ఎంత చెప్పినా వినలేదు. ఇంతలో ఓ పెద్దావిడ.. కిందికొస్తే అమ్మాయినిచ్చి పెళ్లిచేస్తానంటూ అశోక్‌ని నమ్మించింది. చివరికి మూడు గంటల హైడ్రామా అనంతరం అందరూ బతిమలాడడంతో అశోక్‌ కిందకి వచ్చాడు. ఆ తర్వాత బాలిక బంధువులు, స్థానికులు కలిసి అశోక్‌‌ని చితక్కొట్టారు. పోలీస్ కానిస్టేబుల్ ఎంత అడ్డుకున్నా స్థానికులు ఆగలేదు. మొత్తానికి అక్కడి నుంచి అశోక్‌ను పోలీసులు స్టేషన్‌కు తరలించారు.