హైదరాబాద్‌లో కారు నడపలేకపోయాను.. వారికి లైసెన్స్‌లు ఎందుకు ఇస్తున్నారు..?: అక్బరుద్దీన్ ఒవైసీ

హైదరాబాద్‌లో వాహనం నడపడం ప్రపంచంలోనే అత్యంత కష్టమైన పని అని ఎంఐఎం ఎమ్మెల్యే అక్బరుద్దీన్ ఒవైసీ అసెంబ్లీలో వ్యాఖ్యానించారు. తన డ్రైవర్ సెలవులో ఉన్నప్పుడు తానే స్వయంగా కారు నడిపి పడ్డ ఇబ్బందులను ఆయన వివరించారు. ఆటోమేటిక్ కారు ఉన్నా సరే.. ఎవరూ ట్రాఫిక్ నిబంధనలు పాటించకపోవడం వల్ల డ్రైవింగ్ భారంగా మారిందని ఆవేదన వ్యక్తం చేశారు. ముఖ్యంగా తల్లిదండ్రులు మైనర్లకు బండ్లు ఇవ్వడం వల్ల ప్రమాదాలు పెరిగిపోతున్నాయని.. వారు రాంగ్ రూట్‌లో ప్రయాణిస్తూ ట్రాఫిక్ స్తంభించిపోయేలా చేస్తున్నారని మండిపడ్డారు. నిబంధనలు ఉల్లంఘించే వారికి లైసెన్స్‌లు ఇవ్వకూడదని, ట్రాఫిక్ చట్టాలను మరింత కఠినతరం చేయాలని ప్రభుత్వానికి విజ్ఞప్తి చేశారు.