Pawan kalyan Slippers: ఆ ఊరికి చెప్పులు పంపిన పవన్ .. ఎందుకంటే?

ఏపీ డిప్యూటీ సీఎం పవన్ కళ్యాణ్ ఇచ్చిన చిరుకానుక అల్లూరి సీతారామరాజు జిల్లా ఏజెన్సీలో అడవి బిడ్డలకు అంతులేని ఆనందాన్ని ఇచ్చింది. తమ కోసం ఏకంగా ఉప ముఖ్యమంత్రే చెప్పులు పంపడంతో వాటిని ధరించి ఇలా సంతోషం వ్యక్తం చేశారు. ఈ కాలంలో కూడా చెప్పులు లేకుండా తిరుగుతున్న అక్కడి ప్రజల పరిస్థితిని అర్థం చేసుకున్న ఉపముఖ్యమంత్రి.. వారికి చెప్పులు పంపిణీ చేయాలని నిర్ణయించి దాన్ని అమలు చేశారు. ఇటీవలే అల్లూరి సీతారామరాజు జిల్లా డుంబ్రిగూడ మండలం పెదపాడు వెళ్లిన డిప్యూటీ సీఎం పవన్ కళ్యాణ్.. ఆ గ్రామంలో ‘అడవితల్లి బాట’ కార్యక్రమానికి శ్రీకారం చుట్టారు. రిమోట్ ఏరియాలో ఉన్న గ్రామాలకు రహదారి సౌకర్యం కల్పించేందుకు ప్రత్యేక శ్రద్ధ తీసుకుంటున్నారు. ఈ నేపథ్యంలో తనతో నడిచిన కొందరు గిరిజనులకు చెప్పులు లేవని గుర్తించిన పవన్ స్పందించారు. ఈ నెల 7న ఆదివాసీ గ్రామం పెదపాడులో ఉప ముఖ్యమంత్రి పవన్‌ కళ్యాణ్‌ పర్యటించారు. ఆ సమయంలో పాంగి మిత్తు అనే వృద్ధురాలు నడిచి వచ్చి పవన్‌ కళ్యాణ్‌కు స్వాగతం పలికారు. ఆమె చెప్పులు లేకున్నా నడిచి వచ్చి స్వాగతం పలకడంతో పవన్‌ చలించిపోయారు. వెంటనే ఉపాధి హామీ సిబ్బందితో చెప్పి.. గ్రామంలో మొత్తం ఎంత మంది ఉంటారో ఆరా తీయించి.. వారందరికీ ఏ సైజు చెప్పులు అవసరమో సర్వే చేయించారు. గురువారం ఆయన కార్యాలయ సిబ్బందితో 345 మందికి పాదరక్షలు పంపారు. ఉప ముఖ్యమంత్రి కార్యాలయ సిబ్బంది బోయిపల్లి పవన్‌తోపాటు బృంద సభ్యులు, స్థానిక సర్పంచి వెంకటరావు గురువారం ప్రతి ఇల్లు తిరుగుతూ వాటిని పంపిణీ చేశారు. తమ కష్టం తెలుసుకొని.. చొరవ తీసుకొని చెప్పులు పంపిన పవన్‌ కళ్యాణ్‌కు గిరిజనులు కృతజ్ఞతలు తెలిపారు