TG: జీరో కరెంట్ బిల్లు కోసం మీటర్ మార్చాడు.. తర్వాత నెల బిల్లు చూడగానే షాక్..

వనపర్తి జిల్లా కడుకుంట్ల గ్రామానికి చెందిన వెంకటేష్ అనే నిరుపేద కూలీకి విద్యుత్ శాఖ భారీ షాక్ ఇచ్చింది. తెలంగాణ ప్రభుత్వ గృహజ్యోతి పథకం కింద ఉచిత విద్యుత్ కోసం ఆయన తనకున్న పాత బకాయి రూ.813 చెల్లించి, కొత్త మీటర్ అమర్చుకున్నారు. ఇకపై బిల్లు సున్నా వస్తుందని ఆశించగా, నెల తిరిగేసరికి ఏకంగా రూ.7,122 బిల్లు రావడంతో ఆయన దిగ్భ్రాంతికి గురయ్యారు. రెండు గదులున్న చిన్న ఇంట్లో ఇంత పెద్ద మొత్తంలో బిల్లు రావడంపై అధికారులకు ఫిర్యాదు చేసినా ఫలితం లేదని బాధితుడు ఆవేదన వ్యక్తం చేస్తున్నారు. రెక్కాడితే గానీ డొక్కాడని తమకు ఈ భారం భరించలేమని.. వెంటనే స్పందించి న్యాయం చేయాలని ఆయన వేడుకుంటున్నారు.