TGSRTC: ప్రయాణికులకు శుభవార్త చెప్పిన తెలంగాణ ఆర్టీసీ.. ఇలా చేస్తే 10 శాతం డిస్కౌంట్..

తెలంగాణ రాష్ట్ర రోడ్డు రవాణా సంస్థ ప్రయాణికుల కోసం తిరుగు ప్రయాణ టికెట్‌పై 10 శాతం రాయితీని ప్రకటించింది. వెళ్లేటప్పుడే తిరుగు ప్రయాణానికి కూడా రిజర్వేషన్ చేసుకుంటే ఈ తగ్గింపు లభిస్తుంది. ఇప్పటికే రాష్ట్రంలో అమలవుతున్న మహాలక్ష్మి పథకం ద్వారా మహిళలకు ఉచిత బస్సు ప్రయాణ సౌకర్యం కల్పిస్తూ ఆర్టీసీ పల్లె వెలుగు, ఎక్స్‌ప్రెస్ బస్సుల్లో భారీ ఆదరణ పొందుతోంది. గతంలో ఎలక్ట్రిక్ ఏసీ బస్సుల్లో రాయితీలు, సీనియర్ సిటిజన్లకు ప్రత్యేక మినహాయింపులు ఇచ్చిన సంస్థ.. ఇప్పుడు సామాన్య ప్రయాణికులను ఆకర్షించేందుకు ఈ కొత్త ఆఫర్ తెచ్చింది. దీనివల్ల పండుగ సమయాల్లో ప్రయాణికులకు ఆర్థిక వెసులుబాటుతో పాటు సీట్లు దొరకడం లేదనే ఇబ్బందులు లేకుండా ఉంటుంది.