Vangaveeti Ranga Statue: ఉద్రిక్తతలకు దారితీసిన రంగా విగ్రహం ఏర్పాటు..

అంబేద్కర్ కోనసీమ జిల్లా సఖినేటిపల్లి మండలం అంతర్వేదికరలో ఉద్రిక్తత పరిస్థితులు తలెత్తాయి. అంతర్వేదికరలో కాపు సంఘాలు వంగవీటి రంగా విగ్రహాన్ని ఏర్పాటు చేశాయి. అయితే ఈ విగ్రహానికి అనుమతి లేదంటూ పోలీసులు తొలగించారు. దీంతో కాపు సంఘాలు మండిపడ్డాయి. పంచాయతీ నుంచి పర్మిషన్ ఉందంటూ కాపు సంఘాలు వాగ్వాదానికి దిగాయి. తెల్లవారుజాము నుంచి కాపు సంఘాల నేతలు ఆందోళన బాటపట్టారు. ఈ క్రమంలోనే కొంతమంది.. పోలీసులకు వ్యతిరేకంగా నినాదాలు చేస్తూ రోడ్డు మీద బైఠాయించారు. విగ్రహాన్ని మళ్లీ అదే స్థానంలో పెట్టేందుకు ప్రయత్నించారు. అయితే వీరిని పోలీసులు అడ్డుకునే ప్రయత్నం చేయడంతో ఉద్రిక్తత వాతావరణం ఏర్పడింది. అయితే పోలీసులు అడ్డుకునేందుకు ప్రయత్నించినా.. తిరిగి కాపు సంఘాలు వంగవీటి రంగా విగ్రహాన్ని అదే ప్రదేశంలో ఏర్పాటు చేశారు. ఈ సమయంలో రంగా విగ్రహానికి సంబంధించి చేయి విరిగిపోయింది. ఈ సమయంలో పోలీసులు, కాపు సంఘాల మధ్య తోపులాట జరిగింది. మరోవైపు అంబేద్కర్ విగ్రహం పక్కన వంగవీటి రంగా విగ్రహం పెట్టకూడదంటూ ఎస్సీ సంఘం ఆందోళన చేపట్టింది. ఘటనాస్థలికి ఇరు వర్గాలు చేరుకోవడంతో అంతర్వేదికరలో మరోవైపు ఉద్రిక్త వాతావరణం నెలకొంది. దీంతో పోలీసులు భారీ సంఖ్యలో అక్కడికి చేరుకుని పరిస్థితిని సమీక్షిస్తున్నారు.