అరబిందో ఫార్మా కంపెనీని తగలబెడతా.. కాంగ్రెస్ ఎమ్మెల్యే వార్నింగ్

మహబూబ్ నగర్ జిల్లా జడ్చర్ల మండలం పోలేపల్లి సెజ్‌లో ఉన్న అరబిందో ఫార్మా కంపెనీపై అధికారులు చర్యలు తీసుకోకుంటే.. కంపెనీని తగలబెడతానని జడ్చర్ల ఎమ్మెల్యే అనిరుధ్ రెడ్డి హెచ్చరించారు. ఈ మేరకు పొల్యూషన్ కంట్రోల్ బోర్డుకి ఈరోజు సమయం ఇచ్చారు. శనివారం లోపల చర్యలు తీసుకోకపోతే ఆదివారం ఉదయం 11 గంటలకి అరబిందో ఫార్మా కంపెనీ తగలబెడతానని వార్నింగ్ ఇచ్చారు. ఈ మేరకు ఆయన ఒక వీడియోను విడుదల చేశారు. కొన్నేళ్లుగా అరబిందో కంపెనీ యాజమాన్యం కాలుష్యపు నీటిని బయటకు వదులుతుండటంతో పంటలకు నష్టం కలుగుతోందని, ముదిరెడ్డిపల్లి చెరువులో చేపలు చనిపోతున్నాయని అనిరుధ్ రెడ్డి అన్నారు. ఈ విషయంపై శాసనసభలో చర్చించినా.. పొల్యూషన్ కంట్రోల్ బోర్డు అధికారులకు ఫిర్యాదు చేసినా పట్టించుకోలేదని ఆరోపించారు. ఇక తనకు ఓపిక లేదని, శనివారం చర్యలు తీసుకోకపోతే ఆదివారం ఉదయం 11 గంటలకు పరిశ్రమను తగలబెడతానని హెచ్చరించారు.