ఈ నాలుగు జిల్లాల్లో గజగజ.. కమ్మేసిన మంచు దుప్పటి..

తెలంగాణ రాష్ట్రంలోని పలు జిల్లాల్లో శనివారం తెల్లవారుజామున దట్టమైన పొగమంచు ఆవరించింది. ఉమ్మడి వరంగల్, కరీంనగర్, ఆదిలాబాద్, ఖమ్మం జిల్లాల్లో మంచు ప్రభావం ఎక్కువగా కనిపించింది. ఉదయం 10 గంటల వరకు కూడా మంచు వీడకపోవడంతో ఎదురుగా వచ్చే వాహనాలు కనిపించక వాహనదారులు తీవ్ర ఇబ్బందులు పడ్డారు. రహదారులపై ప్రమాదాలు జరగకుండా లైట్లు వేసుకుని నెమ్మదిగా ప్రయాణించారు. మరోవైపు.. వరంగల్ నగరంలో మంచు కురుస్తున్న దృశ్యాలు పర్యాటకులను కట్టిపడేశాయి. నగరం సిమ్లాను తలపిస్తుండటంతో యువత సెల్ఫీలు, రీల్స్ చేస్తూ సందడి చేశారు. చలి తీవ్రత పెరగడంతో ప్రజలు జాగ్రత్తగా ఉండాలని వాతావరణ శాఖ సూచించింది.