కోనసీమలో అదిరిపోయిన డ్రాగన్ పడవ పోటీలు.. బరిలో 250 మంది..

డాక్టర్ బి.ఆర్. అంబేద్కర్ కోనసీమ జిల్లా ఆత్రేయపురంలో సంక్రాంతి వేడుకలు ఘనంగా జరుగుతున్నాయి. రాష్ట్ర ప్రభుత్వం ప్రతిష్ఠాత్మకంగా నిర్వహిస్తున్న 'సర్ ఆర్థర్ కాటన్ గోదావరి ట్రోఫీ'లో భాగంగా రెండో రోజు డ్రాగన్ పడవల పోటీలు ఉత్సాహంగా ప్రారంభమయ్యాయి. ఎమ్మెల్యే బండారు సత్యానందరావు ఈ పోటీలను ప్రారంభించగా, వివిధ రాష్ట్రాల నుండి సుమారు 250 మంది క్రీడాకారులు తరలివచ్చారు. కేరళలోని పడవ పందాల తరహాలో బొబ్బర్లంక-అమలాపురం సాగునీటి కాలువలో ఈ పోటీలు జరుగుతున్నాయి. తొలిరోజు ఈత, రంగవల్లుల పోటీలు మరియు ఫుడ్ ఫెస్టివల్‌తో సందడి చేసిన ఆత్రేయపురం, ఇప్పుడు పడవల పందాలతో పర్యాటకులను విశేషంగా ఆకట్టుకుంటోంది. పూతరేకులకు పేరుగాంచిన ఈ ప్రాంతం ఇప్పుడు సాహస క్రీడలకు వేదికైంది.