చిత్తూరు: ఆర్మీ జవాన్ కార్తీక్ అంత్యక్రియలు

జమ్మూ-కశ్మీర్‌లో ఉగ్రవాదుల కాల్పుల్లో అమరుడైన చిత్తూరు జిల్లాకు చెందిన ఆఱ్మీ జవాన్ పంగల కార్తీక్‌ అంత్యక్రియలు పూర్తయ్యాయి. చిత్తూరు జిల్లా బంగారుపాళ్యం మండలం ఎగువరాగి మానుపెంటకు చెందిన సామాన్య రైతు కుటుంబానికి చెందిన కార్తిక్ 2017లో ఆర్మీలో చేరాడు. సోమవారం నార్త్ జమ్మూ కశ్మీర్లో ఇండియన్ ఆర్మీకి, ఉగ్రవాదులకు మధ్య ఎదురుకాల్పులు జరగ్గా ఈ ఆపరేషన్‌లో కార్తీక్ వీరమరణం పొందాడు. ఈ విషయం తెలిసిన వెంటనే కుటుంబసభ్యులు, బంధుమిత్రులు, గ్రామస్తులు దిగ్భ్రాంతి చెందారు. కార్తీక్ భౌతికకాయాన్ని కశ్మీర్‌ నుంచి విమానంలో బెంగళూరుకు తీసుకొచ్చి అక్కడి నుంచి రోడ్డుమార్గంలో స్వగ్రామమైన ఎగువరాగిమానుపెంటకు తీసుకొచ్చారు. దేశం కోసం ప్రాణాలర్పించిన కన్నబిడ్డను చూసి తల్లిదండ్రులు కన్నీరుమున్నీరుగా విలపించగా... ప్రజాప్రతినిధులు, జిల్లా కలెక్టర్, ఎస్పీ, తహసీల్దారు బాబురాజేంద్రప్రసాద్, రెవెన్యూ ఇన్‌స్పెక్టర్‌ మధుసూదన్‌ తదితర ఉన్నతాధికారులు నివాళులర్పించారు.అనంతరం సైనిక లాంఛనాలతో కార్తీక్‌కి అంత్యక్రియలు నిర్వహించారు. కార్తీక్‌ మృతి పట్ల ముఖ్యమంత్రి చంద్రబాబునాయుడు సంతాపం తెలిపారు.