నెల్లూరు ఖైదీ శ్రీకాంత్‌తో వీడియోలు.. పోలీసులకు అరుణ ఫిర్యాదు

నెల్లూరు సెంట్రల్ జైలులో యావజ్జీవ కారాగార శిక్ష అనుభవిస్తోన్న ఒక రౌడీ షీటర్‌తో హాస్పిటల్‌లో ఒక మహిళ సన్నిహితంగా మెలిగిన వీడియోలు వైరల్ అయిన సంగతి తెలిసిందే. ఆ జీవిత ఖైదు పేరు అవిలే శ్రీకాంత్ కాగా.. అతడితో సన్నిహితంగా ఉన్నది ప్రేయసి నడిగుంట అరుణ. ఈ వీడియోలు కూడా ఏడాది క్రితం నాటివని అంటున్నారు. ఈ వీడియోలు బయటికి రావడం.. తనపై నెగిటివ్‌గా మీడియాలో కథనాలు రావడం ఒక కుట్ర అని, పథకం ప్రకారం జరిగిందని అరుణ అంటున్నారు. ఓ టీవీ ఛానెల్‌కు చెందిన రిపోర్టర్ ఇదంతా చేశాడని.. అతడిపై చర్యలు తీసుకోవాలని పోలీసులను అరుణ ఆశ్రయించారు. ఈ మేరకు గ్రీవియెన్స్‌లో జిల్లా ఎస్పీని అరుణ కలిసి ఫిర్యాదు చేశారు. ఈ తప్పుడు కథనాల వల్ల సొసైటీలో తన పరువు పోయిందని.. ఇరుగుపొరుగు వాళ్లు, బంధువులు తన క్యారెక్టర్‌ను ప్రశ్నిస్తున్నారని అన్నారు. జీవిత ఖైదు అనుభవిస్తోన్న శ్రీకాంత్‌ను తనకు కాబోయే భర్తగా పేర్కొన్న అరుణ.. దినకర్ రాజు జర్నలిజం ముసుగులో అరాచకాలకు పాల్పడుతున్నాడని ఆరోపించారు. అతడిపై క్రిమినల్ కేసులు నమోదు చేయడమే కాకుండా రౌడీ షీట్ ఓపెన్ చేయాలని ఫిర్యాదులో అరుణ కోరారు.