బంగాళాఖాతంలో మరో అల్పపీడనం.. రెండ్రోజుల్లోగా వాయుగుండంగా .. ఈ జిల్లాలలో వానలు

ఏపీవాసులకు అలర్ట్.. సోమవారం నుంచి మళ్లీ వర్షాలు మొదలుకానున్నాయి. మొన్నటి వరకూ భారీ వర్షాలు కురవగా.. వాటి నుంచి తేరుకోకముందే మళ్లీ వరుణుడు పలకరించనున్నాడు. రాగల 24 గంటల్లో బంగాళాఖాతంలో అల్పపీడనం ఏర్పడనుందని వాతావరణ శాఖ అధికారులు తెలిపారు. ఈ అల్పపీడనం రెండు రోజుల్లో వాయుగుండంగా మారే అవకాశం ఉందని వెల్లడించారు, దీని ప్రభావంతో ఉత్తరాంధ్ర జిల్లాలలో పలు చోట్ల మోస్తరు నుంచి భారీ వర్షాలు కురుస్తాయని వాతావరణ శాఖ అధికారులు అంచనా వేశారు. మరోవైపు రాష్ట్రవ్యాప్తంగా సోమవారం పలు జిల్లాలలో తేలికపాటి నుంచి మోస్తరు వర్షం పడుతుందని విపత్తుల నిర్వహణ సంస్థ అంచనా వేసింది.