భర్త చనిపోతే, పిల్లల పోషణ కోసం కువైట్ వచ్చా.. కన్నీళ్లు పెట్టిస్తున్న కాకినాడ మహిళ వీడియో

Kakinada Woman: బతుకుదెరువు కోసం గల్ఫ్ దేశం కువైట్‌కు వెళ్లిన ఓ మహిళ ‘నన్ను చంపేస్తాం అంటున్నారు.. కాపాడండి సార్’ అంటూ వీడియో చేసింది. కాకినాడ జిల్లాకు చెందిన ఈ మహిళ వీడియో అందరినీ కదిలిస్తోంది. గండేపల్లికి చెందిన మహిళ కువైట్ వెళ్లి అక్కడ తాను పడుతున్న చిత్రహింసల గురించి రహస్యంగా వీడియో తీసి తన బంధువులకు పంపించింది. ‘నాకు తిండి సరిగా పెట్టడంలేదు. చంపేసేలా ఉన్నారు. నన్ను కాపాడి, పిల్లల దగ్గరికి చేర్చండి’ అంటూ బాధితురాలు కన్నీటి పర్యంతమైంది. గండేపల్లి మండలం యల్లమిల్లి గ్రామానికి చెందిన గారా కుమారి.. భర్త చనిపోవడంతో పిల్లల పోషణ, కుటుంబ భారం తనపై పడటంతో కువైట్‌కు వెళ్లింది. పిల్లలను తన తల్లికి అప్పగించి, తనకు తెలిసిన వ్యక్తి ద్వారా పాలకొల్లుకు చెందిన ఎం. సుధాకర్ అనే ఏజెంట్ సహాయంతో కువైట్‌లోని జబ్రాలి హమ్మద్ నగరంలో ఒక ఇంట్లో పనికి వెళ్లింది. కువైట్ వెళ్లిన 7 నెలల కాలంలోనే తాను పలు సమస్యలు ఎదుర్కొంటూ, చిత్రహింసలకు గురవుతున్నట్టు వీడియో ద్వారా బాధితురాలు తెలిపింది. ‘నన్ను ఎలాగైనా రాష్ట్రానికి రప్పించండి సార్’ అంటూ మంత్రి నారా లోకేష్‌ను కోరింది.