వామ్మో ఇదేంది సామీ.. డెడ్ బాడీ డోర్ డెలివరీ.. ఓపెన్ చేసిన మహిళ షాక్..

పశ్చిమ గోదావరి జిల్లా ఉండి మండలం యండగండి గ్రామంలో ఊహించని ఘటన జరిగింది. ఓ మహిళ ఇంటికి డెడ్‌బాడీ డోర్ డెలివరీ అయింది. దీంతో ఓపెన్ చేసిన మహిళ షాక్‌కు గురైంది. వెంటనే పోలీసులకు సమాచారం అందించింది. వివరాల్లోకి వెళ్తే.. ఉండి మండలం యండగండికి చెందిన సాగి తులసి అనే మహిళకు ప్రభుత్వం నుంచి ఇల్లు మంజూరైంది. ఇల్లు కట్టుకోవడానికి ఆర్థిక సాయం కోసం రాజమహేంద్రవరం క్షత్రియ సేవా సమితికి తులసి దరఖాస్తు చేసుకుంది. దీంతో ఆ సంస్థ ఇంటి నిర్మాణానికి అవసరమైన సామాగ్రిని పార్శిల్ ద్వారా సాగి తులసి ఇంటికి పంపిస్తోంది. ఈ క్రమంలోనే ఈసారి విద్యుత్ సామాగ్రిని పంపించామని తులసికి సమాచారం ఇచ్చారు. దీనికి సంబంధించిన పార్శిల్ ఇటీవలే వచ్చింది. ఆటో డ్రైవర్ ఈ పార్శిల్ తీసుకుని వచ్చి ఆమెకి అప్పగించాడు. అయితే అది ఓపెన్ చేయగానే అందులో మృతదేహం చూసి తులసి, ఆమె కుటుంబసభ్యులు షాకయ్యారు. మృతదేహంతో పాటుగా కోటి 30లక్షల రూపాయలు ఇవ్వకపోతే ఇబ్బందులు పడతారంటూ ఓ బెదిరింపు లెటర్ ఉంది. దీనిపై తులసి కుటుంబసభ్యులు పోలీసులకు సమాచారం ఇచ్చారు. దీనిపై పోలీసులు దర్యాప్తు జరుపుతున్నారు.