శెట్టిబలిజ వన సమారాధనలో రసాభాస.. మంత్రి ఎదుటే తన్నకున్న ఇరు వర్గాలు

కాకినాడ జిల్లా శెట్టిబలిజ సంక్షేమ సంఘం ఆధ్వర్యంలో స్థానిక మెక్లారిన్‌ స్కూల్ ఆవరణలో వన సమారాధన జరిగింది. ముఖ్య అతిథిగా మంత్రి వాసంశెట్టి సుభాష్ హాజరై మాట్లాడారు. ఐక్యత అనే నినాదంతో ఈ కార్యక్రమం ఏర్పాటు చేసుకున్నామని.. అంతా కలిసి ఉండాలి అన్నారు. ఇతర కులాలను గౌరవించాలని.. ఎన్నికల్లో ఇద్దరు శెట్టిబలిజలు పోటీ చేస్తుంటే కులసంఘ నాయకులు.. పార్టీలు, రాజకీయాలకు దూరంగా ఉండాలి అన్నారు. ఎవరికి నచ్చిన వారికి వారు ఓటేయాలి.. కుల సంఘ నాయకులు ఓ పార్టీ వైపు సిద్ధం అనడం సరికాదు అన్నారు. కుల సంఘాలను రాజకీయాలకు అడ్డుపెట్టుకోకూడదని.. సిద్ధం, సిద్ధం అంటూ కుల సంఘ నాయకుడు బలపరచిన వ్యక్తి ఎన్నికల్లో ఓడిపోతే పనులు ఏమైనా చేయించగలరా? అన్నారు. ముఖ్యమంత్రి సహాయనిధి ఇప్పించగలరా? అందుకే కుల సంఘీయులు ఎన్నికల్లో రాజకీయాలకు దూరంగా ఉండాలి అని వ్యాఖ్యానించారు. దీనిపై వేదిక కిందన ఉన్న కొంతమంది అభ్యంతరం వ్యక్తం చేస్తూ గొడవకు దిగారు. దీనిపై మంత్రి స్పందిస్తూ తాను ఎవరి పేరూ ప్రస్తావించలేదన్నారు. మంత్రి వర్గీయులు కూడా వాగ్వాదానికి దిగడంతో గొడవ జరిగింది. మంత్రి జోక్యం చేసుకుని తమ వర్గీయులు వెనక్కి వచ్చేయాలని సూచించారు. రెండువర్గాల మధ్య తోపులాట జరగ్గా, ఒకరిద్దరు కుర్చీలు ప్రత్యర్థి వర్గంపై విసిరారు. అంతలో పోలీసులు, పెద్దలు రంగంలోకి దిగి పరిస్థితిని చక్కదిద్దారు.