అయ్యప్ప భక్తులకు తప్పిన ప్రమాదం.. మంటల్లో కాలిపోయిన బస్సు

శబరిమలకు భక్తుల తాకిడి పెరిగింది. భారీ సంఖ్యలో అయ్యప్ప స్వాములు దర్శనానికి తరలివెళ్తున్నారు. తెలుగు రాష్ట్రాల నుంచి కూడా అధిక సంఖ్యలో భక్తులు.. అయ్యప్ప దర్శనానికి వెళ్తున్నారు. ఈ క్రమంలోనే ఆంధ్రప్రదేశ్‌లోని శ్రీకాకుళం జిల్లా నుంచి కూడా కొంతమంది భక్తులు అయ్యప్ప దర్శనానికి వెళ్లారు. అయితే అయ్యప్ప దర్శనం పూర్తి చేసుకుని తిరిగి వస్తున్న సమయంలో.. వారు వెళ్లిన బస్సుకు ప్రమాదం జరిగింది. మంటలు చెలరేగి బస్సు పూర్తిగా కాలిపోయింది. అయితే ఈ ప్రమాదంలో స్వాములందరూ సురక్షితంగా బయటపడటంతో అందరూ ఊపిరిపీల్చుకున్నారు. తమిళనాడులోని కంచి వద్ద ఈ ప్రమాదం జరిగింది.