కేసీఆర్ కుటుంబం భూములపై కమిటీ.. ప్రభుత్వ, అసైన్డ్, ఆక్రమణలు సహా 16 అంశాలపై విచారణ

తెలంగాణలో భూముల వ్యవహారాలపై రాష్ట్ర ప్రభుత్వం కీలక నిర్ణయం తీసుకుంది. మాజీ సీఎం కేసీఆర్‌, ఆయన కుటుంబ సభ్యులతో పాటు మాజీ మంత్రులు, ఎమ్మెల్యేలకు సంబంధించిన భూముల అంశాలపై విచారణకు ప్రత్యేక కమిటీని ఏర్పాటు చేసింది. మొత్తం 16 అంశాలపై ఈ కమిటీ దర్యాప్తు చేయనుంది. ప్రభుత్వ, అసైన్డ్‌, భూదాన్‌, సీలింగ్‌, ఇనాం, అటవీ భూములతో పాటు మల్లన్నసాగర్‌, మిడ్‌మానేరు భూసేకరణ, పరిహారం, ధరణి మాడ్యూళ్ల వినియోగం వంటి అంశాలను కూడా విచారణ చేయనున్నారు. 5 జిల్లాల్లో క్షేత్రస్థాయి పరిశీలన చేపట్టనున్న కమిటీ.. అక్రమాలు, నిబంధనల ఉల్లంఘనలు తేలితే బాధ్యులను గుర్తించి చర్యలకు సిఫారసు చేయనుంది.