తిరుమల శ్రీవారి భక్తులకు దూసుకెళ్లిన 108 వాహనం.. ఇద్దరి మృతి, మరో ముగ్గురికి గాయాలు

Tirupati Road Accident Devotees Died: తిరుపతి జిల్లాలో 108 వాహనం బీభత్సం సృష్టించింది. చంద్రగిరి మండలం నరసింగాపురం దగ్గర రోడ్డుపక్కన తిరుమలకు నడిచివెళ్తున్న శ్రీవారి భక్తులపైకి దూసుకెళ్లింది. ఈ ప్రమాదంలో ఇద్దరు మహిళలు చనిపోగా.. మరో ముగ్గురికి గాయాలయ్యాయి. పుంగనూరు నుంచి తిరుమలకు కొంతమంది భక్తులు కాలినడకన వెళ్తుండగా ఈ ప్రమాదం జరిగింది. ముగ్గురికి గాయాలవ్వడంతో తిరుపతి రుయా ఆసుపత్రికి తరలించి చికిత్స అందిస్తున్నారు. వీరిని అన్నమయ్య జిల్లా రామసముద్రం మండలం చెంపాలపల్లి వాసులుగా గుర్తించారు.