పెన్సిల్ మొనపై జీసస్.. అదరగొట్టిన వెంకటేష్

అనకాపల్లి జిల్లా నక్కపల్లి మండలం చినదొడ్డిగల్లు గ్రామానికి చెందిన సూక్ష్మ కళాకారుడు గట్టెం వెంకటేష్ గురించి చాలా మందికి తెలిసే ఉంటుంది. ఈ సూక్ష్మ కళలో అతడు గిన్నిస్ వరల్డ్ రికార్డును కూడా నెలకొల్పాడు. జాతీయ పురస్కారంతో పాటు ఎన్నో అవార్డులు అందుకున్నాడు. చదువుకుంటూనే సూక్ష్మ కళపై పట్టుసాధించి.. ఆర్కిటెక్చర్‌లో గ్రాడ్యుయేషన్ పట్టా అందుకున్నాడు. విశాఖపట్నంలోని గీతం యూనివర్సిటీలో బ్యాచిలర్ ఆఫ్ ఆర్కిటెక్చర్ చదివిన వెంకటేష్.. ప్రస్తుతం అమెరికాలోని చికాగోలో ఉద్యోగం చేస్తున్నాడు. అయితే, సూక్ష్మ కళపై అతడికి ఉన్న మక్కువ మాత్రం తగ్గలేదు. ఇక ఇప్పుడు దేశం విడిచి వెళ్లిన తర్వాత కూడా తన సూక్ష్మ కళను కొనసాగిస్తున్నాడు. అమెరికాలో ఆర్టిస్ట్‌గా సర్టిఫికెట్ పొందాడు. ఇక రేపు క్రిస్మస్ పండుగను పురష్కరించుకుని పెన్సిల్ మొనపై ప్రపంచంలోనే అతిచిన్న జీసస్ క్రీస్తు విగ్రహాన్ని ఆవిష్కరించాడు. చార్‌కోల్ పెన్సిల్ మొనపై 18 మిల్లీ మీటర్ల పొడవు, 8 మిల్లీమీటర్ల వెడల్పుతో ఏసయ్య విగ్రహాన్ని చెక్కాడు. ఈ కళాఖండాన్ని రూపొందించడానికి తనకు 3 గంటల సమయం పట్టిందని వెంకటేష్ తెలిపాడు.