భార్యతో కలిసి ఉత్సాహంగా డ్యాన్స్ చేశాడు.. పాట పూర్తయిన కాసేపటికే..

భార్యతో కలిసి ఉల్లాసంగా డ్యాన్స్ చేసిన వ్యక్తి.. పాట పూర్తి కాగానే గుండెపోటుతో కుప్పకూలి మరణించాడు. ఈ విషాద ఘటన విశాఖపట్నం జిల్లా పెందుర్తి మండలం పెదగాడిలో చోటుచేసుకుంది. పెదగాడికి చెందిన అప్పికొండ త్రినాథ్‌ వయస్సు 56 ఏళ్లు. ఆయనకు భార్య లక్ష్మీ, కుమారుడు, కుమార్తె ఉన్నారు. డ్రైవర్‌గా పని చేస్తూ కుటుంబాన్ని పోషిస్తున్నారు. అమ్మవారి నిమజ్జనం సందర్భంగా ఆదివారం రాత్రి జరిగిన ఊరేగింపులో త్రినాథ్ డ్యాన్స్ చేశారు. భార్య లక్ష్మీ కూడా అతడికి తోడవ్వడంతో ఇద్దరూ కలిసి ఉత్సాహంగా నృత్యం చేశారు. అయితే పాట పూర్తయిన కాసేపటికే త్రినాథ్‌ ఒక్కసారిగా కుప్పకూలిపోయాడు. గ్రామస్థులు అతడిని హాస్పిటల్‌కు తీసుకెళ్లగా ఆయన అప్పటికే మృతి చెందినట్లు వైద్యులు తెలిపారు. ఆ వార్త విని కుటుంబసభ్యులు షాక్‌కు గురయ్యారు. పండగ వేళ గ్రామంలో విషాద ఛాయలు అలుముకున్నాయి.