రేపే జూబ్లీహిల్స్ పోలింగ్.. స్కూల్స్, కాలేజీలు, ఆఫీసులకు రెండు రోజులు సెలవులు..

రాష్ట్ర రాజకీయాల్లో ఉత్కంఠ రేపుతున్న జూబ్లీహిల్స్ ఉప ఎన్నిక పోలింగ్ సందర్భంగా, రేపు నియోజకవర్గ పరిధిలోని అన్ని ప్రభుత్వ, ప్రైవేట్ పాఠశాలలు, కాలేజీలు సహా ఐటీ ఆఫీసులకు కూడా సెలవు ప్రకటించారు. కలెక్టర్ హరిచందన ఈ ఆదేశాలు జారీ చేశారు. ఎన్నికల సంఘం (ఈసీ) పోలింగ్‌కు సర్వం సిద్ధం చేసింది. ఈ హై-ప్రొఫైల్ పోరులో భద్రతకు పెద్దపీట వేస్తూ.. డ్రోన్ల ద్వారా పర్యవేక్షణ చేయనున్నారు. 2060 మంది ఎన్నికల సిబ్బంది, 2000 మంది పోలీసు సిబ్బంది మోహరించనున్నారు. ఓటర్లు స్వేచ్ఛగా ఓటు వేయడానికి, ఎలాంటి అవాంతరాలు లేకుండా ఎన్నికలు పూర్తి కావడానికి ఈ కట్టుదిట్టమైన ఏర్పాట్లు చేశారు. ఓటర్ల సమస్యల కోసం 1950 హెల్ప్‌లైన్ అందుబాటులో ఉంటుంది.