Chandrababu Birthday Celebrations: చంద్రబాబు బర్త్‌ డే సెలబ్రేషన్స్.. మామూలుగా లేవుగా!

ఆంధ్రప్రదేశ్ రాష్ట్ర ముఖ్యమంత్రి నారా చంద్రబాబు నాయుడు 75వ వసంతంలోకి అడుగుపెట్టారు. ఈ సందర్భంగా ఆయన పుట్టిన రోజు వేడుకులను రాష్ట్రవ్యాప్తంగా ఘనంగా నిర్వహించారు. ఆయన సొంత నియోజకవర్గం కుప్పంలో సీఎం పుట్టినరోజు వేడుకలు ఘనంగా నిర్వహించారు. చంద్రబాబుపై తమకు ఉన్న అభిమానాన్ని కుప్పం మహిళలు వినూత్నంగా తెలియజేశారు. తమ వేలిముద్రలతో సీఎం చంద్రబాబు చిత్రాన్ని రూపొందించారు. ఇది ఎంతగానో ఆకట్టుకుంటోంది. ఇక ఆయన పుట్టినరోజు సందర్భంగా పలువురు ప్రముఖులు ఆయనకు శుభాకాంక్షలు తెలియజేశారు. ప్రధాని నరేంద్ర మోదీ, తెలంగాణ సీఎం రేవంత్ రెడ్డి, వైసీపీ అధినేత జగన్ మోహన్ రెడ్డి, సినీ నటుడు చిరంజీవి, డిప్యూటీ సీఎం పవన్ కళ్యాణ్, ఎమ్మెల్సీ నాగబాబు, మాజీ ఎంపీ విజయిసాయి రెడ్డితో పాటు తదితరులు ఎక్స్ వేదికగా శుభాకాంక్షలు తెలిపారు. అటు ఏపీ గవర్నర్, మంత్రులు, రాజకీయ నాయకులు, కార్యకర్తలు, అభిమానులు ఇలా ఎంతో మంది సోషల్ మీడియా వేదికగా ఆయనకు శుభాకాంక్షలు తెలిపారు. చంద్రబాబు పుట్టినరోజు సందర్భంగా పాలకొల్లులో మంత్రి నిమ్మల రామానాయుడు ధర్మారావు ఫౌండేషన్ ఆధ్వర్యంలో ఘనంగా వేడుకలను నిర్వహించారు. నియోజకవర్గ ప్రజలు తరఫున పుట్టినరోజు శుభాకాంక్షలు తెలియజేస్తూ కేక్ కట్ చేసి అందరికీ పంచారు. 106వ రక్తదానం శిబిరంలో 50 మంది రక్తదానం చేశారు. తర్వాత పేద మహిళలకు చీరలు, దివ్యాంగులకు బియ్యం, దుప్పటి వంటివి అందజేశారు. విజయవాడలో కేశినేని నాని, బుద్ధ వెంకన్న కేక్ కట్ చేసి వేడుకలు నిర్వహించారు. నక్కపల్లిలో హోం మంత్రి అనిత క్యాంప్ కార్యాలయ వద్ద ఘనంగా సీఎం చంద్రబాబు పుట్టినరోజు వేడుకలు నిర్వహించారు. 75వ పుట్టినరోజు సందర్భంగా 75 కిలోల కేక్ కట్ చేసి,శుభాకాంక్షలు తెలిపారు. తిరుమలలో టీడీపీ నేతలు చంద్రబాబు పుట్టిన రోజును పురస్కరించుకుని వెంకటేశ్వర స్వామికి ప్రత్యేక పూజలు నిర్వహించారు. అనంతరం కొబ్బరి కాయలు కొట్టి.. ఆయనకు మంచి ఆయురారోగ్యాలను ప్రసాదించాలని కోరుకున్నారు.