Tamil nadu man Cycle journey with one Hand: ఒంటి చేత్తో సైకిల్ యాత్ర.. కఠినమైన సాహసం వెనుక కదిలించే కారణం

రోడ్డు ఎంత కఠినమైనా, ఎత్తుపల్లాలు ఎన్ని ఉన్నా... తన చక్రాలకు రెక్కలు తొడిగి, ఆత్మవిశ్వాసంతో వేగాన్ని అందిపుచ్చుకుని విహరిస్తున్న ఒక అసాధారణ సైక్లిస్ట్ కథ ఇది. ఈయన పేరు తమీమ్ అన్సారి. వయసు 38 ఏళ్లు. తమిళనాడులోని తూతుకుడి జిల్లా, తిరుచెండూర్ తాలూకా అత్తూర్ ఈయన స్వస్థలం. ఈయనకు కుడి చేయి లేదు. అయినప్పటికీ ఒంటి చేత్తో సైకిల్ మీద విహరిస్తూ అందరినీ ఆశ్చర్యపరుస్తున్నారు. ఇప్పటికే 50 వేల కిలోమీటర్లకు పైగా సైకిల్ తొక్కిన తమీమ్ అన్సారీ.. కొన్ని రోజుల క్రితం బెంగళూరు నుంచి 6 వేల కిలోమీటర్ల సైకిల్ యాత్ర మొదలుపెట్టారు. బెంగళూరులో మొదలై ముంబై, ఢిల్లీ, కోల్‌కతా, చెన్నై నగరాలను కవర్ చేస్తూ 14 రాష్ట్రాల్లో ప్రయాణించి చివరకు మళ్లీ బెంగళూరు చేరుకోవాలి. తమీమ్ ప్రయాణ దాదాపు పూర్తికావచ్చింది. ఆదివారం నెల్లూరు జిల్లాలోకి అడుగుపెట్టిన తమీమ్.. మా సమయం రిపోర్టర్ శ్రీనివాస్ కంటబడ్డారు. క్లీన్ సిటీ, గ్రీన్ ఇండియా అనే నినాదంతో ఒంటి చేత్తో సైకిల్ తొక్కుకుంటూ వెళ్తున్న తమీమ్‌ను చూసి ఆశ్చర్యపోయారు. వెంటనే తమీమ్‌ని పలకరించి ఆయన గురించి అడిగి తెలుసుకున్నారు. ఆయన ఆత్మవిశ్వాసం చూసి ముచ్చటపడ్డారు.