Ysrcp Waqf Bill Petition: సుప్రీం కోర్టులో వక్ఫ్ బిల్లుపై వైసీపీ పిటిషన్

పార్లమెంట్‌లో ఆమోదించి, రాష్ట్రపతి ఆమోదం పొందిన వక్ఫ్ బిల్లుపై ప్రస్తుతం దేశవ్యాప్తంగా నిరసనలు జరుగుతున్నాయి. ఈక్రమంలోనే వక్ఫ్ చట్టంపై సోమవారం వైసీపీ సుప్రీంకోర్టును ఆశ్రయించడం సంచలనంగా మారింది. ఈ మేరకు వక్ఫ్ చట్టాన్ని సవాల్ చేస్తూ సుప్రీంకోర్టులో పిటిషన్ దాఖలు చేసింది. ఇందులో వక్ఫ్ చట్టంలో ముస్లింలకు అభ్యంతరకరంగా ఉన్న పలు క్లాజుల్ని రద్దు చేసేలా కేంద్రాన్ని ఆదేశించాలని వైసీపీ తమ పిటిషన్‌లో కోరినట్లు తెలుస్తోంది. ముస్లిం సమాజం ఆందోళనలను పరిష్కరించడంలో వైఫల్యం, రాజ్యాంగ ఉల్లంఘనలను తీవ్రంగా పరిగణిస్తూ.. వక్ఫ్ బిల్లును సవాలు చేస్తూ తాము సుప్రీంకోర్టులో పిటిషన్ దాఖలు చేసినట్లు వైసీపీ ఎక్స్‌లో ఓ పోస్టు పెట్టింది. ఈ బిల్లు రాజ్యాంగంలోని ఆర్టికల్ 13, 14, 25తో పాటు 26 లను ఉల్లంఘిస్తుందని పేర్కొంది. ప్రాథమిక హక్కులు, చట్టం ముందు సమానత్వం, మత స్వేచ్ఛ, మతపరమైన వర్గాలు తమ సొంత వ్యవహారాలను నిర్వహించడానికి.. స్వయంప్రతిపత్తి హామీ ఇచ్చే నిబంధనలు ఇందులో ఉన్నాయని తెలిపింది. సెక్షన్ 9, 14 కింద ముస్లియేతర సభ్యులను చేర్చడం వక్ఫ్ సంస్థల అంతర్గత పనితీరులో జోక్యంగా పరిగణించాలని వైసీపీ సుప్రీంకోర్టును కోరింది. ఈ నిబంధన బోర్డుల మతపరమైన లక్షణాన్ని, పరిపాలనా స్వాతంత్రాన్ని దెబ్బతీస్తుందని తెలిపింది.