మచిలీపట్నం బ్యాంక్‌లో అసిస్టెంట్ మేనేజర్ ఘనకార్యం.. బంగారాన్ని కొట్టేశాడు

కృష్ణాజిల్లా మచిలీపట్నం రాజా సెంటర్‌లోని కర్ణాటక బ్యాంకులో భారీ కుంభకోణం బయటపడింది. అసిస్టెంట్‌ మేనేజర్‌గా పనిచేస్తున్న జి.సోమశేఖరరావు బ్యాంకులో ఖాతాదారులు తాకట్టుపెట్టిన బంగారు నగల స్థానంలో రోల్డు గోల్డ్ నగలు ఉంచి.. అసలు నగలను కాజేశాడు. ఆ నగలను వేరే బ్యాంకుల్లో పెట్టి లోన్లు తీసుకున్నట్టు పోలీసులు గుర్తించారు. చాలా కాలంగా జరుగుతున్న ఈ వ్యవహారం బ్యాంకు అధికారుల ఆడిట్‌లో బయటపడింది. ఖాతాదారులు ఆందోళన చెందాల్సిన అవసరం లేదన్నారు కర్ణాటక బ్యాంకు అధికారులు. అసిస్టెంట్‌ మేనేజర్‌గా పనిచేస్తున్న సోమశేఖరరావు బంగారాన్ని దొంగిలిస్తున్నా... మేనేజర్‌ శ్రీహరికి తెలియకపోవడంపై ఉన్నతాధికారులు అనుమానం వ్యక్తంచేస్తున్నారు. ఆయన స్థానంలో వేరొకరిని ఇన్‌చార్జిగా నియమించారు. ఈ వ్యవహారంపై బ్యాంకు ఉన్నతాధికారుల ఫిర్యాదుతో ఆర్‌పేట పోలీసులు కేసు నమోదు చేశారు. ఇప్పటికే సోమశేఖరరావును అదుపులోకి తీసుకున్నట్టు తెలిసింది. అతను విజయవాడలోని వివిధ బ్యాంకుల్లో ఈ బంగారాన్ని తాకట్టుపెట్టాడని పోలీసులు చెబుతున్నారు.